طريق السعادة منين يا كابتن؟

May 15, 2016 -- by Ahmed Yousry

Ahmed Yousry

اي حد بيطلع رحلة او بيظبَّط حفلة، بيعد يحضَّر للموضوع من قبله بفترة طويلة جدا. و في الاخر وارد جدا ان الموضوع ميطلعش بالشكل اللي هو عايزه.

المهم في الاخر ان الشخص بيقيس مدى نجاح الحاجة ديه بكمية السعادة و الاستمتاع اللي حسها.

فلما نيجي نتكلم عن السعادة، لازم نجيب سيرة هرمون الدوبامين و هو المسؤول الاول عن الاحساس بالسعادة و المتعة.

معنى كلمة السعادة بيختلف من شخص لشخص. ممكن تكون السعادة عند شخص هي السفر و لف العالم كله،او تكون اختراع او استكشاف محدش عمله قبل كده، او ممكن تكون عمل حجات مجنونة و خطرة.

انواع و طرق السعادة ملهاش حدود


في رأيي، عشان الانسان يكون سعيد في اي حاجة بيعملها، لازم ياخد قرار و يحقق الحاجة ديه من غير ما يفكر كتير. و ديه اول خطوة من خطوات الوصول للسعادة


تاني خطوة ممكن نسميها "اضحك، الصورة تطلع حلوة". الابتسامة جزء اساسي لتحقيق السعادة. بس برضه اهم حاجة ان الابتسامة ديه تكون من القلب، مش مصطنعة.


تالت حاجة هي انك تسمع اكتر ما تتكلم. اختار دايما الناس اللي بتثق فيهم، هم دول احسن ناس تقدر تسمع منهم و تاخد رأيهم. مش مهم يكون الشخص ده باباك او مامتك او حد من اخواتك او حتى حد من صحابك، المهم يكون الشخص ده عرفك وحفظك جدا و عارف ايه اكتر حاجة بتخليك سعيد و مبسوط.


رابع خطوة من الاخر كدة انك متقفش تتفرج على الناس و هي بتحقق كل اهدفها و بتعيش احلى لحظات حياتها، يلا و الله اسمع الكلام، يدوبك تلحق تعمل كل اللي نفسك فيه و اللي هيخليك تقول جملتنا المشهورة "انا اسعد واحد في الدنيا ديه.


الخطوة اللي قبل الاخيرة انك لازم تقدر قيمة الحاجة اللي نفسك تعملها. يعني مش هتعرف تحقق الحاجة ديه الا لو انت ان تحقيقها هيفرق كتير في حياتك حتى لو الناس كلها شايفة غير كده.


آخر خطوة و هي اهم خطوة، انك متخفش من المغامرة او تجربة حاجات جديدة. متخليش الروتين يسيطر عليك، ابدء حياة جديدة في كل دقيقة بتعدي عليك.


علشان تحقق السعادة الكاملة، لازم تحقيق هدفك يتبني على كل الخطوات اللي فاتت.

و احب انهي الموضوع بمقولة شهيرة للكاتب الاستاذ عبد الوهاب مطاوع: "الحياة يا صديقي رحلة بحث مستمرة منذ فجر الانسانية عن السعادة.. و في رأيي ان كل ما يحقق سعادة الانسان دون الاضرار بالآخرين و دون الخروج عن تعاليم السماء مقبول و مشروع بل و مطلوب بشدة"

السعادة بالنسبالي، هي اني اعيش بقيت عمري في جزيرة هاواي

انت لسه قاعد بتقرا؟؟!!  قوم يلا و ابدء رحلة تحقيق حلمك و هدفك





Leave a Reply

Name*
Email*
Website


2 Comments


July 30, 2016, 3:51 p.m. -- by aya ali

بجد كلام حضرتك رائع وانا هى حاجه حلوه انى احقق اهدافى واحلامى بس ساعات المجتمع بيبقى مانع حاجات كتير بالذات على البنت وخصوصا فى الصعيد ببقى حاسه كانه عالم تانى وده الصعب الى بيكون فى موضوع تحقيق الاهداف


May 31, 2016, 11:50 a.m. -- by Adel Thabet

u can say it a gain .wonderful